ជុះអាចម៍ដាក់កុដិ លួចចង្ហាន់លោកស៊ី ចាក់ដៃលោកគ្រូនឹងស្លាបប៉ាកា រវើរវាយរឿងស្នេហា ជក់មើលល្ខោន ទាស់គ្នាព្រោះដណ្តើមសំណែនអ្នកតា…ក្មេងវត្តជំនាន់នោះនៅកុដិជាមួយគ្នាជាក្រុមៗ។ ពួកគេបរិភោគអាហារពីរពេលក្នុងមួយថ្ងៃ រៀនអាន និងសរសេរអក្សរក្រោមការបង្ហាត់បង្ហាញរបស់ព្រះសង្ឃ ហើយត្រូវតបស្នងសងគុណលោកវិញដោយការគក់ច្របាច់ពេលលោកឈឺថ្កាត់ និងដាំទឹកប្រគេនលោកជាដើម។ ក្មេងៗរៀនពូកែត្រូវលោកគ្រូបញ្ជូនឲ្យទៅរៀននៅ “សាលាបារាំង”។

ជិវភាពប្រចាំថ្ងៃ ព្រមទាំងជីវិតក្មេងវត្តក្នុងខេត្តកំពង់ចាមនាទស្សវត្សឆ្នាំ១៩៤០ ជាមួយរឿងរ៉ាវដ៏គួរឲ្យអស់សំណើចជាច្រើន ត្រូវបានអ្នកនិពន្ធ ជុត ខៃ លើកយកមកបង្ហាញនៅក្នុងរឿង “ក្មេងវត្ត” នេះ។